شوفة البر

ملائكة الحب

مُديّرْ المُنتَدىَ
هاجسي جهّز ادلال القصايد وشوم
عن مجالس هل النمه وهرج القفا

لا تفكر ترافق في مسيرك رخوم
رافق الطيبين اهل الكرم والوفا

شوفة البر واللمة بذيك القروم
وشبة الضو والجلسة بجوٍ صفا

تشرح الصدر وتزيل الزعل والهموم
وتنعش البال وتنّسي ليال الجفا

ماعليّه من القيض ولفيح السموم
خلني في ذرا السافي اذا انه سفا

لاجتمعنا وصار الليل طيّب اعلوم
تحت سقف المراجل ثم كلً غفا

لين موعد صلاة الفجر ثمّن يقوم
كل واحد محيّي في صباحن لفـا

وعطّر الارض ريحة هيلنا ...والعزوم
فوق هام السحاب وجمرنا ماطفـا

وبعد كم سالفة فنجال قمنا نحوم
صيد بعضه لنا والبعض ربي عفـا

فوق روس الطوال العصر قمنا نروم
ماعلينا لو ان الجيب فينا طفا

خوت(ن) مابها وجهً كريه وذموم
مالحقها شكوك وعيب والّا أفـا

يابن آدم قصير العمر لو هو يدوم
والله انك بعد 70 تصرخ ( كفا )

والله اني لو آخذ في هوى البر يوم
افضل من الف يوم بجو مدن وهفا

ما على مثلي ان حب المقانيص لوم
كيف والقلب منها ماقنع واكتفا

دامها لكل جداني وربعي سلوم
جاريه في عروقي مثل دم الشفا

كلمات الشاعر / سعود الربيلي
 

walaa yo

كبار الشخصيات
طاقم الإدارة
سلمت يداك عكل شيء تقدمه مواضيع كلها جميله
 

مواضيع مماثلة

أعلى