امهات كثير بتشتكي من المشكلة دي .. اتصرف اذاي مع ابني ؟
هل انا ليا دور في علاجه ولا الطبيب بس هو المسئول ؟
العلاج حياخد وقت قد ايه ؟
اولا .. لو طفلك عنده فرط حركة لدرجة كبيرة بتسبب له مشاكل او انه بيعرض نفسه للخطر .. هنا يحتاج علاج دوائي .. لكن لو سلوكه مش مسبب مشاكل .. يحتاج علاج سلوكي .. العلاج الاساسي من وجهة نظري بنسبة 70% على الاسرة .. لكن لو الاسرة مش عارفة تتعامل مع الطفل .. هنا محتاجين لمعالج يساعد الام وابنها
ثانيا .. اللوم والنقد و العقاب وعصبية الام يزيد المشكلة
عارفه انه بيكون مستفز .. بس العقاب يخليه عنده شعور بالقلق .. والقلق يزيد الحركة ويقلل الانتباه
ثالثا .. محتاج انه يطلع طاقته الحركية في مكان .. زي نادي او حتى يلعب تحت البيت
او حتى تخصصي اوضة في بيتك للعب وتكون مافيهاش حاجة ممكن تاذي الطفل
رابعا.. من وقت للثاني شاركي ابنك في اللعب .. فيحس بالدعم والاهتمام و الحب .. ده جزء اساسي في العلاج .. لان الطفل من كثر مابيتعرض للنقد بيبدا يحس انه طفل مرفوض وغير محبوب
خامسا.. ممكن تعملي جدول للمكافاة والعقاب .. وتحددي سلوكيات .. لو عملت كذا .. وتحددي السلوك بوضوح .. حتتكافئ .. فتحفزي الطفل انه يعمل سلوك ايجابي
والعقاب يكون بالحرمان من حاجة الطفل بيحبها .. خروج او لعبة .. وبلاش حرمان من المصروف
سادسا .. في العاب بتستخدم لزيادة الانتباه عند الاطفال وتقلل من سلوكهم الحركي
سابعا.. عشان تقللي من حركة طفلك .. الفتي انتباهه لسلوك ثاني يعمله من غير حركة .. زي الرسم مثلا او اللعب بالصلصال وممكن تشاركيه في ده .. او يشاركه اخواته
ثامنا .. لو ابنك عنده تشتت انتباه .. استخدمي معاه جمل قصيره وواضحة ومحددة .. عشان تكون استجابته افضل
تاسعا.. ضروري يكون في تواصل بصري بينك وبين ابنك وانت بتكلميه عشان تتاكدي انه منتبه معاك
عاشرا .. ضروري تركزي على تغذية صحية ومفيدة للطفل .. عشان يكون عنده قدرة على التركيز
لو اشتركتي لابنك في نشاط .. من ناحية حيطلع طاقته .. ومن ناحية ثانية تبني ثقته في نفسه .. لانه حيلاقي دعم وتشجيع وتنافس في اللعب
. ممكن تستخدمي حبوب اوميجا 3 فيتامينات لتغذية المخ .. المكسرات .. انه يمص معلقة عسل نحل بعد كل وجبة .. يمص مش يبلع .. عشان تطلع للمخ مباشرة يستفيد منها
اسلوبك وصبرك .. هو الي يحدد سرعة العلاج
واي سلوك اي بني ادم بيتعلمه مش الاطفال بس .. بيحتاج مجهود وصبر واستمرار
ا/ سماء نصار
اخصائية استشارات نفسية وزواجية وتعديل سلوك
