نفسك قبل اي حد تاني

جودي ومودي

Well-known member
..
أم صفية اسم بحبه جدا .. قعدت فترة او حبة حلوين بربيها لوحدي .. كنت في الاول بخبط في نفسي .. لوحدي مش عارفة اعمل ايه أو اجي منين ..
الحمدلله كل حاجه بتحصل في الدنيا دي لسبب
ربنا حكيم عليم .... بقالي فترة في مشاكل وعدم استقرار اسري .. عادي بتحصل (كنت دايما اقول لروحي كده)
لازم تبقي قوية عشان صفية (بلاش تعيطي ادامها)
فضلت مستقوية كده لغاية ما قلبي جمد مبقتش عارفة اعيط .. بقيت احسد لما الاقي واحده بتبكي..
حتى في السجود قلبي لا يلين .. قسوة الناس مع واحده مش فاهمه نفسها ممكن تعمل فيها ايه .. غضب وخوف ومعاناة.. مشاعر بهرب منها بالسخرية ع نفسي ..
الا ان التحقت بحلقة قران .. القران كلام ربي مع تدبره قلبي لان ياااه ايه السكينة دي .. وبدأت اعرف أبكي تاني.. البكاء لله نعمة ...البكاء رحمة في القلوب التعبانه
وبالوقت كنت سعيدة جدا باختلاف مشاعري .. بدأت اشعر اني عايشة .. بدأت حاجه تتغير من جوايا .. وجوايا كان صوت بيطمني اصبري ظروفك هتتحسن ..
وربنا رزقني وتزوجت ... وبفضل الله رزقت بولدىسميته ابراهيم.. ركن قلبي الى ابو ابني .. تصورت اني كده خلاص هو سندي .. حصل الخذلان بطريقة صعبة
انا وهو مبقناش عارفين نتعامل مع بعض.. علاقة زي الحجر .. بدأت اجمد جوايا مع كل لحظه الم عيشتها .. معاناه اني اخد قرار الطلاق في علاقة مسمومة .. تفكيري كان عائق ليا عشان اعيش صح
حصل الطلاق بعد معاناه ... لجأت في الفترة للناس لعل الحال ينصلح .. حصل الطلاق كان قرار صعب بعد ما مريت بكذا تجربة زواج خلتني مرعوبة من الطلاق اكتر من اهتمامي ان انهي قرار ايه الانفع لاولادي واولا ايه الانفع لبسنت شخصيا ..
مكنش ده تفكيري سعتها .. كنت بشوف الدنيا بعيون الآخرين وانا اخر واحده في الحسابات .. المهم انا في الدايرة دي من زمان
اعتمد ع اي حد غير ربنا ... اتخبط ع دماغي ... اخرج بمناورة نفسيا ..اجمد ..لما بقيت حقيقي جرانيت فولاذ
بسخر من كل التحديات اللي بتقابلني وبسنت محتاجه للتعاطف .. كنت سخيفة جدا مع نفسي .. التعامل مع النفس بالرفق مش بالسخرية
كل اللي يعرفني عارف اني مبحبش المشاعر
بس القريبين عارفين اني والله بحبها جدا .. لكن خبرتي مش حلوة مع الناس .. اتأذيت كتير ..
طلعت بتعامل غلط مع نفسي ... بتعامل عكس خلقتي.. عكس فطرتي ... نسيت انا مين ..انا امراة ... ضعيفة لكن قوية بالله
اكتشفت اني بالرغم ان بتصرف صح تحت الازمات (اني كل ما اقع اقف ع رجلي ... استعين بالله في كل خطوة ... ربنا جل في علاه هو المعين ) لكن كنت مبعرفش اطلب المساعده من حد .. نسيت ان الناس لبعضها .. جمدت اوي من برة لدرجه اني بقيت هشة من جوايا جدا .. فالمنظر قوية جدا (لكن ده منظر بس) متصدقوش لما تلاقوا ست لابسة ماسك الفولاذ .. اعرفوا انها البهدلة نفسيا ..
بس الحقيقة غير كده ده تصنع انا اجيده من كتر ما المعاناه من خذلان من اي حد اقربله .. طبعا المعاناه دي انا ليا يد فيها ده بلا شك (امراض نفسية ومشاكل تربوية.. من الاخر عدم وعيي بذاتي خلتني اخد خطوات كتير غلط في حياتي) ...
المهم قشرتي بقت صلبه اكتر واكتر
لغاية مبقتش مستحمله ... وبرضه نادرا لما الجأ لحد
بيبان اني قوية ومفترية وساخرة ع كل الظروف .. بس ده وش خشب بستخدمه كوسيله دفاع
الموضوع محزن جدا ... انا عارفة ان في ستات ممكن تحسدني.. لكن الحقيقة اني نسيت طبيعتي .. لخبطه توهان.. عصبية .. خوف مستمر من كل حاجه .. معاناه طريقة تفكيري هي سببها مش الظروف زي ما كنت واهمه
اتعلمت اني انا محتاجه اتحمل مسؤلية افعالي وقراراتي .. بدل ما انا عمالة بفكر زي شخصية الضحية وكمان عمالة اتريء ع نفسي .. محتاجه ابين ضعفي واطلب المساعده من باب الاخذ بالاسباب .. بدأت اخد جلسات كوتشينج .. بالوقت عرفت بسنت .. بدأت أحبها..ولسه بحاول أحبها.. بظأت اتعاطف مع نفسي بدل ما انا والظروف والناس سلخنها
اتعلمت اطلب المساعده من غير توقعات من الشخص اللي ادامي.. اطلب وادي مساحه انها تعتذر .. ابقي ع طبيعتي كبشر وكأنثى .. ولما يتتطلب الأمر قوية بالله وبميت راجل
طول الوقت كنت مش مصدقة رسايل ربنا من خلال تجارب حواليا وتجارب بتحصيل شخصيا .. لما بدأت اسمع بقلبي الرسايل كترت ..فهو معكم أينما كنتم .. وانت يا حبيبتي يا اللي بتقري البوست كمان في رسايل بتجيلك منه بس تصدقي انها ليكي وكل ما الرسايل هتزيد كل ما هتقربي وتحسي برضا
رساله واحده الفترة دي اتكررت عليا .. عارفين ايه؟
بسنت اظهري ضعفك.. اطمني.. سيبي نفسك لله .. كفاية سيطرة ع الظروف اللي اساسا مش بايدك فمجهودك مهدر
بقيت اقنع نفسي ان ضعفي ضعف بشري متأصل في كل انسان .. بسنت انت مش سوبر mum
ضعفي مش عيب.. مش حاجه اتكسف منها
ظروفي أقدار قدرت عليا .. تجاربي اتعلمت منها مش حاجه تسبب لي عار أو خزي أو احراج
بدا قلبي يلين تاني .. بدات اهتم ببسنت اكتر .. بعمل حجات مكنتش بعملها .. بسنت بقيت احب الطفلة اللي جوايا واحتويهل .. بدل ما انفسن واضغط نفسي واقعد اكره نفسي كل ما حد يضايقني.. بدأت اسامح اللي حواليا واحد ورا التاني .. عرفت ان العفو مفتاح عشان احافظ ع قلبي .. كل واحد دوره بيجي في اللي اذوني .. حتى العفو والصفح للغير مبتكش ع نفسي فيه عشان موجعهاش .. بس بدعي .. ووقت ما ربنا يأذن هقدر اسامح واعفو
الا من اتى الله بقلب سليم .... ايه بحبها ومتعلقة بيها جدا .. آية بتحركني.. رغيت رغي السنين ..حبيت أشارككم جزء من بسنت ..
متسمحوش لحد يأذيكم .. تجاهلوهم وركزوا ع نفسكم .. لما تعرفوا نفسكم هتعرفوا أفعال ربنا معاكم.. ارتاحوا لان اللي مع ربنا لن يضيعه.. وكل ما افكاركم تبقى حقيقية بإيجابية عن نفسكم كل ما تتحكموا في تصرفاتك نفسكم ثم مع الناس اللي حواليكم ..
كل واحد أو واحده فينا ممكن تكون بتعاني من ظروف معينه .. معاناتها هتروح وتختفي تماما لما تركز ع اللي في ايدها وتسيب اللي برة ايديها لربنا .. هي دي الحياة الطيبة .. الحياة فيها الم عشان نتعلم ونبقى احسن .. فيها امتحانات أو ابتلاءات .. ليبلوكم فيكم احسن عملا ...فتحنا في تحسن مستمر طول ما احنا في رحلتنا الآخرة.. حبيبتي ما يفعل الله بعذابكم ان شكرتم وآمنتم .. معاناتك من تفكيرك .. ألمك ده في وسعك بس سيبيها ع الله .. عيشي بهدف .. تقبلي نفسك و ذاتك اللي انت ببتخانقي معاها دون وعي .. عيشي بحب .. بس اهم حد تحبيه هو نفسك
​
 

romioooo

Well-known member
دائما متميز في الانتقاء
سلمت على روعه طرحك
نترقب المزيد من جديدك الرائع
دمت ودام لنا روعه مواضيعك
لكـ خالص احترامي
 

مواضيع مماثلة

أعلى