كيف اجعل زوجى يبادرنى بالصلح

جودي ومودي

Well-known member
ازاي اخلي زوجي او خطيبي يبادر بالصلح لو هو اللي غلط؟
معلومة مهمة في الموضوع ده ان اكتر شئ يضايق البنت او الزوجة ان شريك حياتها يوم ما يزعلها مايعتذزش
والحقيقة ان الرجالة بتعتذر بس مش بالطريقة اللي الانثي بتبقي مستنياها فهو يبقي شايف انه عمل اللي عليه وهي تبقي شايفة انه جاي عليها
1/الراجل بيصالح بالافعال يعني لو زعلان معاها ممكن وهو راجع من الشغل يجيب حاجة وهو جاي البيت (عشاء مثلا فاكهة)
وهنا بيبقي قاصده حقك عليا وهو بيديهالك
او انه لما يدخل يوجه ليكي اسئلة هو القميص بتاعي الكحلي فين اي اسئلة عشان يكلمك حتي لو مش محتاج الشي اللي بيسال عليه بس طبعا بيتكلم بنبرة صوت غير اللي كان بيتكلم بيها وقت الخناقة
2/اكبر غلط بقي بيتعمل هو انها تظهر غضبها برفض يعني يكلمها تقوم مكشرة او قايمة من المكان اللي هو فيه او ترزع الباب في وشه او تبص بقرف لانها في سرها بتقول قميص ايه اللي انت بتسأل عليه هو احنا بنتكلم اصلا
3/الصح انها تعبر عن زعلها بحزن يعني تظهر حزنها لكن ترد علي اسئلته وكلامه واي شي يوجهولها لكن رد علي قد اسئلته بنبرة حزينة مش بنبرة تحدي او زهق
4/اي حد وقت الخلاف لما بيلاقي اللي قدامه رافضه ما بيحبش يصالح لكن لما بيلاقي اللي قدامه بيظهر حزنه ومديله مساحة يتكلم معاه بيعرف يستغل المساحة دي ويراضي اللي قدامه
5/ماتغيريش معاملتك اهتمي بنظافة البيت ولبسه حتي وقت الخصام عشان وقت ما انتي كمان تزعليه ما يعندش انه يعمل المسؤليات اللي عليه وهنا غالبا هيحس بالذنب وهيحاول يتكلم ويبادر
6/ انتي زعلانة منه هو مش من الدنيا كلها فاظهري حزنك لكن ايه علاقة ده انك تهملي في شكل لبسك.. او في هزارك وكلامك مع ولادك..فيحاول يصالحك عشان يدخل في دايرة الهزار دي مش العكس انه يبعد اكتر طالما الجو كله نكد
7/الموقف اللي يزعلك لازم تعاتبي عشان ياخد باله وما يتكررش ويعرف ان خاطرك غالي عن طريق شوية نقاط
_اقبلي اي مبادرة منه ماتصدهوش
_لما يجي يقولك ماتزعليش بلاش تجيبي سيرة حاجة قديمة.. او تلومي لوم يخليه هو يندم انه بيصالحك
الكلام هيبقي من النوع ده
انا عارفة انك مش قصدك بس انا زعلت جدا
مقدرة انك هتاخد بالك بعد كده
انت اكتر واحد بيهتم بشعور اللي حوليه فعشان كده استغربت ازاي تزعلني
العتاب يبقي برفق مش كأنه في ركن الاعتراف عشان ما يعندش بعد كده لو غلط ويقول انا مش غلطان
لكن بأكد لازم تقولي انا الشي ده ضايقني واثقة انك مش قصدك عشان الراجل لو ماتعتبش بينسي وبنرجع نشتكي ونقول انا اللي عودته ان زعلي مش مهم
وتحية شكر للرجالة اللي يوم ما بتغلط في حق حد بتعتذر ودايما ماشية بمبدأ الاية اللي بتقول (لن تنالوا البر حتي تنفقوا مما تحبون)​
 

jarges

Well-known member
دائما متميز في الانتقاء
سلمت على روعه طرحك
نترقب المزيد من جديدك الرائع
دمت ودام لنا روعه مواضيعك
لكـ خالص احترامي
 

مواضيع مماثلة

أعلى