ضغوط البقاء بين الازواج

جودي ومودي

Well-known member
أنا ضد أي نوع من المحايلات أو "ضغوط البقاء" في العلاقات الانسانية كلها..
سواء صداقة أو خطوبة أو زواج..
اللي قرر يمشي نساعده يمشي مع السلامة مش نضغط عليه ليبقى..
الصداقة مش شفقة ومش بالضغط.. والحب والخطوبة مش شفقة ومش بالضغط..
إيه معنى المحايلة وتقديم القرابين النفسية والجسدية والعاطفية عشان شخص عايز يمشي واحنا بنضغط عليه يفضل موجود في حياتنا؟
خايفين من إيه؟
خايفين نتحطم من غيره ومانعرفش نعيش؟
دي فكرة مشوهة معرفيًا وممكن تبقى دليل على نمط تعلق مرضي..
مفيش شخص واحد مهما كان هو مين حياتنا هتقف من غيره..
خايفين ومشفقين على نفسنا من الألم والوجع؟
لا عادي هنتألم ونتوجع وناخد وقتنا وبعدين هنتعافى بإذن الله وهنعيش ونحب نتخطب تاني بإذن الله..
لأن جس وات؟
وجودك ف علاقة مع شخص مش عايزك هيوجعك بصور مختلفة ومزمنة برضو..
وهيعزز احتياجك للتعلق المرضي بالشخص ده..
خايفين مانلاقيش حد تاني يصادقنا أو يحبنا؟
مجرد فكرة إن فلان بعينه أو فلانة بعينها هما بس اللي حياتنا هتبقى سعيدة معاهم فكرة ساذجة..
لأن ببساطة أنت ماشوفتش كل سكان الكرة الأرضية وبعدين قررت تختار الشخص ده من وسطهم..
اللي حصل إن الشخص ده اتحط ف طريقك لحكمة ما قدرًا وبشكل خارج عن تخطيطك وعن شطارتك وعن اختيارك..
فتعرف منين إن مفيش شخص تاني وتالت ورابع هيليق معاك أكتر من الشخص اللي أنت متعلق بيه ده؟
لو الأفكار والمخاوف دي اتصلحت؟
هنشوف الأمور بطريقة مختلفة.. وهنشوف أشخاص تانية وفرص جديدة..
العلاقة الناضجة هي علاقة بين طرفين بكامل إرادتهم الحرة عايزين يكملوا مع بعض.. إنما لو طرف قرر إنه مش عايز؟ ليه نضغط ونمسك فيه ونعيط ونتحايل؟ هو حتى لو استجاب للعياط والمحايلة وكده وقرر إنه مايمشيش عشان ضميره وجعه، دي هتبقى علاقة صحية؟
هتبقى علاقة سعيدة يعني اللي فيها طرف قاعد على مضض عشان مشفق ع الطرف الآخر الضعيف؟
قد يقول قائل:
إنت ليه شايفها ضغط ومحايلة؟ ليه مش شايفها كفاح وتمسك بالحب؟؟
الرد: الكفاح والتضحية والتمسك بالحب لما يكون الطرفين "عايزين" العلاقة لكن في ظروف ضدهم.
أيوة طبعًا تتمسك وتضحي وتقاتل وتكافح من أجل من تحب -لحدود معينة- طالما هو كمان بيكافح معاك لنفس الهدف..
لكن لو من تحبه ده هو/هي اللي مش عايزك؟؟
إيه الكفاح والتضحية ف إني أضغط عليه أو أبتزه عاطفيًا عشان يقعد؟
مشاعرنا بتتحكم في جزء كبير من قراراتنا الخاطئة..
والقرارات الخاطئة دي بتضيع من العمر..
الخوف من وجع المشاعر بيمنعنا عن تصحيح أخطاء كتير بتنخر في سلامنا النفسي وتاكل من سنوات عمرنا..
التحرر من الخوف ده مش معناه إننا مش هنتوجع..
معناه فقط إننا هنتدرب نتعامل مع الأوجاع بصورة موضوعية وفعالة عشان نمتلك زمام حياتنا ومانسيبهاش تحت رحمة مشاعر خوف أو مشاعر تعلق مرضية..​
 

nothing else matters

Well-known member
يا جودي ومودي كل الشكر والامتنان على روعهـ بوحـكـ
..
وروعهـ مانــثرت .. وجماليهـ طرحك
 
أعلى