ملائكة الحب
مُديّرْ المُنتَدىَ
السلام عليكم أعضاء...
خليني احكي لكم عن نفسي شوي...( فيما يتعلق ب تخصصي وهواياتي) ...
هوايتي : كانت الرسم ودخلت المسابقات وبحمد الله تعالى " ماهرة في الرسم السريع " ...وتركت الرسم، وبحب الكتابة كتير...قمت بتأليف رواية انكليزية بتتألف ٤٠٠ صفحة معروضة حاليا بموقع أمازون والحمدلله........!
دراستي : درست ال Special needs ( الاطفال ذوي الاحتياجات الخاصة ) . بتذكر اني ما كنت راغبة كتير بتخصصي ..
لكن هيك صار... وحاليا بشتغل ب حمد رب العالمين مع منظمة عالمية لإغاثة الأطفال حول العالم - هون ب كندا.
الشغل ممتع وحلو ومغامرات...
فيه مشي كتير.. وخصوصا تحت التلج .. بس والله مغامرات حلوة وكيف التعامل مع الناس وخاصة بهالمجتمع الغربي...
المهم...
أمنيتي الصراحة، ..واكتشفت هالشي بعد لما كبرت و جلدتني الحياة كتير..
أيوه...الحياة وتجاربها...جَلدتني وهذّبتني... وشكراً إلك يا ال " الحياة"...يلي نتعلّم منك كل يوم...
نحن بهالحياة...لما تدخل التجارب فينا ..وتدخل السموم فينا أحيانا ..لا بدّ لنا ندخل ( مشفى الحياة )...
هي المشفى يلي لازم نتعاطى الحُقن والعمليات المؤلمة والأدوية المُرّة لاستخلاص المرض والسموم يلي دخلت فينا...
من أجل تطهير قلوبنا وأخلاقنا....
نرجع لموضوعنا ... يلي فيه الزبدة بين السطور...
بعد خبرتي بالحياة..ودراستي ل علم النفس والتعرّف على شخصيات الناس ... والتعامل معهم....اتمنيت لو درست المحاماة. لو كنت محامية...بس أيّة " محامية"؟
محامية...تشتغل بالسجون مع أصعب أنواع البشر....
نعم، المجرمين...
المجرمين يلي بسمّوهم البعض " وحوش"... هدول يلي دفعتهم ظروفهم لارتكاب الجريمة ، ونزلت دموعهم وما شهد هالشي إلا نجوم الليل..
وصرخوا بصمت... وما شهد هالشي إلا نزيف قلبهم...
وجلدتهم الحياة أكتر.. واتعرضوا للتعذيب والعقاب..فزادتهم شراسة ....
هدول المجرمين...هم انسان، أول ما نفكر بدنا نعاقب .. لازم نعاقب سلوكهم مش الشخص نفسه.
المجرم هادا انسان... (( انسان )) . كان طفل متلنا متله في يوم من الأيام...بس ليش عمل الجريمة؟
أنا ما عم بتعاطف مع أي مجرم عمل جريمة وبيستحق العقاب.
لكن ديما لازم نفهم قبل العقاب.. (( الإصلاح))...
هادا أعظم من العقاب..هادا أفضل جهاد من إنك تمسك سيف وتقتل العدوّ. تفكر انك انتصرت بقتله؟؟ لا والله... إلا كُرهاً !!
وهيك كمان... (( محامية في الإصلاح الاجتماعي))..
كم تمنيت كون محامية... وقابل هالمجرمين..ويكون هدفي الصبر معهم حتى يتوبوا وتغتسل قلوبهم وأفكارهم ..ويتحولوا لأشخاص طاهرين..
الموضوع مش سهل ولا بسيط، وبده أكيد تفصيل ...
لكن برؤوس أقلام..حبيت أنثر لكم أمنيتي بهالحياة..وطموحي يلي للأسف عبارة عن أمنية، لأنه ظروفي ما بتسمح...
بتمنى كل هالمجرمين... ولأن بعضهم ما بيندموا للأسف لو كان مصيرهم الاعدام. بل إنو بعضهم بيتعاملوا بقسوة وتعذيب وبتخليهم شرسين أكتر..وبدل ما يقتلوا أجسادهم.. بموتوا وهي عقولهم وقلوبهم ما زالت ميتة...........!
يا ريتني محامية لأرفع هالرسالة ، وحاول جهدي تنتشر بسجون العالم... ليكون هدفنا (( الإصلاح فالتطهير والتغيير للأفضل)) ...!
ما أجمل إنك تدعي كافر للاسلام خير من إنك تقتله !!
ما أجمل نغير قلوب الناس وعقولهم للخير..أفضل ما نعاقبهم!!
* هادا الموضوع ليس هدفه التقييم رجاء، فأنا لست من هواة التقييمات ولا الترقية ع مستوى النت...ما أبغيه، هو الرقيّ الفكري والثقافي والديني الروحاني بإذن الله تعالى.
وارجو أعجبكم موضوعي البسيط، والسلام ....
