الزعل بين الزوجين

قيثارة

كاتب جيد جدا
ماينفعش يحصل زعل بين الزوجين لاي سبب وتقولوا مش لازم نتناقش فيه علشان الموضوع بيقلب خناقه مثلا... وان مع الايام الامور هتتغير وخلينا نتركها للزمن يداويها ،، و خلينا ساكتين احسن!!!
فلازم تعرفوا ان دا بيهدد علاقتكم الزوجية ومن اخطر الامور.
فاللي بيحصل ان كل شيء بيتدهور في العلاقة اكتر واكتر ، والست دا بيخليها بارده أثناء العلاقة الشرعية، والراجل لا يستوعب هذا الامر.
وتلاقي بعدها الزوج بيتلكك على اي شيء، والست بتكتم وتكتم وتسكت ودا لغاية ما تحصل لحظة الانفجار العظيم وساعتها ممكن تتقال كل الأخطاء السابقة مره واحده، وبتكون ساعتها خناقه كبيره جدا بينهم، وقد يصل الأمر مع بعض الازواج للطلاق لا قدر الله .
واللي ينصحكم انكم تسكتوا وتعدوا علشان المركب تمشي ... انتبهوا دا طريق دمار العلاقة الزوجية.
فالرجاء لما تحصل اي مشكلة لازم نتكلم ونتناقش فيها وكل واحد يعبر عن اللي ضايقه للآخر ودا يحصل اول بأول..
لكن دا علشان ينجح... محتاج مراعاة بعض الامور .
اولا : ما ينفعش تحصل المناقشة وقت الغضب، لازم ننتظر لغاية لما نهدا ، ونحاول نغير مزاجنا باي شيء قبلها.
ثانيا : ما تبدأش كلامك لشريكك بتوجيه له الاتهام " انت اخطأت في كذا وكذا" ولا تنقده بشكل جارح، ولا تقوله اول ما يبدأ يتكلم معاك في اللي بيضايقه " آه انا عارف انت عايز تتكلم في ايه" .. لان كل هذه الامور بتشعل المناقشة وبتحولها لخناقه.
ثالثا : ابدأ كلامك بالثناء على صفاته الحلوه وبعدين اشرح له انت تضايقت من ايه وركز على اللي ضايقك من الموقف بدون ما تنقد شخصيته بأي شيء وانهي كلامك بالثناء انه تقبل كلامك بصدر رحب وانك عارف انكم هتوصلوا لحل وسط.
وربنا يصلح حال الجميع ودمتم على خير
#رشا_حمودة
المستشارة الأسرية وممارس الدعم النفسي وتطوير الذات

 

مواضيع مماثلة

أعلى