خرابة البيوت

جودي ومودي

Well-known member
صديقتا اللي رجعت عالبلد هي وولادا البيبيات الصغار‍‍ وضل جوزا بالغربة نصحتا ترفض وترجع وتقول لاء يا بيرجع معها يابتضل معو
قالتلا لاتتركيه
#لاااا_تتركيه عندك اطفال صغار لازم يكبرو قدام عيونكم انتوا التنين ..
شبابك وصباك واحلى ايام عمرك لازم يكون معو لاتتركي حالك تحترقي وتدبلي متل الوردة اللي انقطفت بعز تفتيحا ...
#لما_صديقتا اقتنعت ورفضت سفر زوجا وثارت وطالبت انو يكونوا سوا .. سموا رفيقتا خرابة البيوت . ✏**صديقتا التانية اللي ضاع احلى سنين حياتا وهي عم تخدم بيت حماها ... وبيت حماها لا حمدا ولا شكورا .. معتبرينا متلا متل اي خادمة فلبينية لازم تفتح عيونا وتركد بالكل ... والكل عليها .. وهي الشاطرة والحبابة واللي بتضل بتقول معلش مافي شي بيضيع .. بس الزمن فرجاها انو عمرا عم يضيع وشبابا عم يضيع وحتى احترامن الها ضايع .. الاحترام كان مخبى للقوية اللي عرفانة حقوقا وواجباتا وماعم تضيع عمرا على شي مو مطلوب منها ولا بتتحاسب اساسا اذا قالت لاء ..
#لما_نصحتها تحط حد لكلشي وتطالب تطلع لحالا وعليها وعلى اعدائا سموا رفيقتا خرابة البيوت ..
✏***صديقتها اللي كانت عم تاكل كل كم يوم قتلة من جوزا وتتورم عيونا من البكا مشان اسباب تافهة وبعد شوي بيبكي وبيصالحها وبيقلا الشيطان
وبتصالحو متل الغبية وبتقول بحبو مو بإيدي
لما نصحتها وقت يضربا تنزل على اقرب مخفر وتشتكي عليه وتمسح فيه الاراضي وتخليه يعد للمليون قبل مايرفع ايدو .. واذا ركب راسو وبدو يطلق مشان هالقصة يطلق لان العيشة بكرامة ارحم بكتير من الذل معو كل يوم ..
#لما_طبقت_كلام_صديقتا قالوا عن هالصديقة خرابة البيوت .
✏****لما نصحت صديقتا المخطوبة تكتب مهرها غير مقبوض لتاريخ كذا ولازم تاخد مهرها اللي هو حقا خلال فترة معينة ونصحت صديقتا التانية تسترجع ديونها من زوجا لان هاد حقا وهو محاسب على كل وقت بيماطل فيه #سموا_هالصديقة خرابة البيوت ...
اليوم
صديقتها اللي كان زوجا مسافر رجع لحضنا بعدما كبرت القصة وقالت الحمدلله انا شو كان صار فيني لو ضليت ساكتة ؟
صديقتا اللي طالبت تطلع من بيت حماها وانو بيكفي ولادا صارو طولها وعمرها عم يضيع ولازم بقى تاخد حقا وترتاح من الخدمة اللي مالا اي مبرر
اليوم ساكنة بغرفة وصالون صغار كتير بس فرحتها اكبر من حدود العالم وقاعدة ولابسة تيابا اللي كانت عم تحلم تشلح العباية وتلبسن ساعة براحتا وعم تعرف تربي ولادها بدون اي حشرية وتدخل وعم تقول الحمدلله بكل ساعة وبكل دقيقة
صديقتا اللي نزلت واشتكت وانحبس زوجها اسبوع متل الكلب وكتب تعهد انو مابقى يرفع ايدو عليها .. طلع وحلف يمين ليدفعا تمن اللي عملتو فيه وبعد كم يوم خرس وسكت وعرف ان الله حق وانو ماحدا واقف معو لان الضرب ماحدا بيقبلوا ... اليوم عم يعد للمليون قبل مايجرب يرفع ايدو وصرلو اكتر من سنة مااسترجى يعيدا .
صديقتا اللي نصحتا تقبض مهرها وترجع ديونها وتحافظ على اللي ألها .. شافتا راكبة سيارة صغنونة زمرتلا وقالتلا طلعي لاعزمك على مشوار وباركيلي بالسيارة ...
ولليوم عم يسموا هالصديقة خرابةالبيوت لان دايما بتنصح صديقاتها انو مايضيعوا حقوقهم وما يكونوا لقمة سهلة قدام هالمجتمع الظالم ..
#معكم_خرابة_البيوت_شخصيا"
اذا كنت عند بعض الرجال وبيوت الاحمى والناس اللي مابتخاف من الله خرابة بيوت .. فأنا متأكدة اني عند رب العالمين سبب لاني انصح نصيحة ما بتعارض لا دين ولا شرع ولا حتى قانون ..
بقى انطموا .. انطمووواا .. وافهموا وبيكفي ظلم .
​
 

m7mood

Well-known member
يا جودي ومودي كل الشكر والامتنان على روعهـ بوحـكـ
..
وروعهـ مانــثرت .. وجماليهـ طرحك
 

مواضيع مماثلة

أعلى